وش هي Li-Fi؟
Li-Fi طريقة اتصال لاسلكي تستخدم الضوء بدل موجات الراديو اللي يستخدمها Wi-Fi.
بس هي ما تجيب لك الإنترنت من الأساس. الإنترنت يوصل للمبنى بالطريقة المعتادة، ألياف أو 5G أو غيرها، وبعدها يوصل بكيبل لنقطة الاتصال اللي بالسقف. بعدها Li-Fi تنقل البيانات من نقطة الاتصال لجهازك عن طريق الضوء.
والمقصود فيها شبكة كاملة ترسل وتستقبل البيانات، وتخدم أكثر من مستخدم. ويقدر المستخدم ينتقل بين نقاط الاتصال بدون ما ينقطع الاتصال. أما مصباح يرسل بيانات لحساس في اتجاه واحد، فهذا يسمونه VLC، وهو أبسط بكثير.
كيف تنتقل البيانات بالضوء؟
اللمبة تغيّر شدة النور بسرعة ما تقدر تلاحظها بعينك. والجهاز يستقبل هالتغيرات ويحولها لبيانات.
وبعض الأنظمة ما تطفي النور بالكامل، بس تغيّر شدته بسرعة.

وفي الجهاز حساس صغير اسمه Photodetector، يستقبل الضوء ويحوّله لإشارة كهربائية.
طيب، كيف يرسل جوالك البيانات؟ بعض الأنظمة تستخدم الأشعة تحت الحمراء للإرسال، وبعضها تستخدم موجات الراديو.
هل لازم يكون الضوء مرئي؟
لا، مو لازم. معيار IEEE 802.11bb اللي اعتُمد في 2023 يستخدم الأشعة تحت الحمراء، بطول موجي من 800 إلى 1000 نانومتر. وهذا خارج نطاق الضوء اللي تقدر تشوفه بعينك، واللي يتراوح تقريبًا بين 400 و700 نانومتر. وبعض أنظمة Signify تشتغل حتى لو النور طافي.
هل هي أسرع من Wi-Fi؟
في تجارب المختبر على تقنية VLC، وصل الباحثون لسرعة 15.7 Gb/s باستخدام أربع لمبات LED بألوان مختلفة، وفي تجربة ثانية وصلوا إلى 7.9 Gb/s باستخدام مصدر ضوئي صغير جدًا (Micro-LED). لكن هذي تجارب مختبرية، والأجهزة فيها ثابتة ومحاذاة بدقة، وبعض التجارب كانت على مسافات قصيرة جدًا.
أما المعيار فيحدد معدلات نقل من 10 Mb/s إلى 9.6 Gb/s. وهذا ما يعني إن كل جهاز يدعم المعيار بيحقق هالسرعة.
وWi-Fi بعد قاعد يتطور. معيار Wi-Fi 7 يدعم سرعة نظرية تصل إلى نحو 46 Gbit/s في ظروف مثالية. فلما تقرأ إن Li-Fi أسرع من Wi-Fi بمية مرة، انتبه: ممكن تكون المقارنة بين سرعة مختبرية وسرعة فعلية بالاستخدام اليومي.
بس وش الفايدة من السرعة إذا مجرد حجب الضوء عن الحساس ممكن يقطع الاتصال؟
المميزات والعيوب
من مميزاتها إن الأنظمة اللي تستخدم الضوء في الاتجاهين ما تحتاج موجات راديو، وهذا يفيد في بعض الأماكن مثل المستشفيات والمصانع.
وبما إن الضوء ما يخترق الجدران، يسهل تخصيص اتصال مستقل لكل غرفة، ويقل التداخل بين الغرف.
لو حطيت يدك بين اللمبة والحساس الموجود في جهازك، ممكن ينقطع الاتصال. يعني حتى حركتك العادية ممكن تأثر عليه.
وتغطيتها محدودة، فإذا رحت لمكان بعيد عن نقطة الاتصال، تحتاج نقطة ثانية تغطيك.
ولو كان جوالك بجيبك، ما راح يوصله الضوء. وحتى ضوء الشمس القوي ممكن يأثر على الاتصال.
طيب، هل هي آمنة أكثر؟
أصعب، بس مو محصّنة.

فيه دراسة بحثت إمكانية التقاط الإشارة من خارج المبنى، عن طريق الضوء اللي يطلع من النوافذ، وبيّنت إن بعض السيناريوهات تسمح بهذا. يعني مو صحيح إن الاتصال بالضوء مستحيل التجسس عليه. الضوء ممكن يطلع من النوافذ أو ينعكس ويوصل لأماكن ثانية، وهذا يعني إن وجود الاتصال داخل الغرفة ما يمنع التقاط الإشارة بشكل كامل.
يعني وجود الضوء داخل الغرفة يعطيك حماية إضافية، لكنه ما يغني عن التشفير.
ليش ما انتشرت للحين؟
صار لنا أكثر من عشر سنوات نسمع عن Li-Fi، لكن ليش للحين ما انتشرت؟
أول مشكلة هي دعم الأجهزة. محد بيشتري نقاط Li-Fi إذا أجهزته ما تدعمها، والشركات ما عندها سبب تضيف حساسات Li-Fi للأجهزة إذا ما فيه نقاط اتصال منتشرة. وإذا تبي تجرب بعض الأنظمة الموجودة، غالبًا تحتاج قطعة إضافية مثل دونقل USB للابتوب.
وفيه بعد اختلاف المعايير. عندك IEEE 802.11bb، وعندك ITU-T G.9991 من الاتحاد الدولي للاتصالات، وبعض المنتجات التجارية تعتمد عليه. واختلاف التقنيات المستخدمة بينهم ممكن يصعّب توافق الأجهزة والأنظمة مع بعض.
والتكلفة بعد مشكلة. راوتر Wi-Fi واحد ممكن يغطي شقة كاملة، لكن Li-Fi تحتاج نقاط اتصال أكثر عشان تغطي المكان، وكل نقطة لازم توصل بالشبكة. يعني فيه تمديدات وتركيب وتكلفة إضافية.
وفوق هذا، Wi-Fi قاعد يتطور باستمرار، وكل جيل جديد يحسن السرعة والتغطية. وهذا يخلي الانتقال لـ Li-Fi أقل إغراءً إذا ما كانت فيه حاجة فعلية لها.
ومع ذلك، فيه أماكن تناسبها، خصوصًا اللي يكون فيها استخدام موجات الراديو غير مناسب، أو الاتصالات القصيرة والثابتة.
وين مكانها؟
Li-Fi ما راح تلغي Wi-Fi، لكنها ممكن تكون خيار مناسب في الأماكن اللي ما يناسبها استخدام موجات الراديو.
والأقرب إن الاثنين يكملون بعض؛ Li-Fi في الأماكن المناسبة لها، وWi-Fi لما تتحرك أو تبتعد عن نقطة الاتصال.